SHILLONG: Ri Bhoi a·jani Umtrew songo rikenggipa zoo-ko matchotna siengaha aro bakan ia zoo-ko tourist-rangna kulignok ine Sonibar salo, a·dokni Chief Minister Conrad K Sangma parakataha.
Ia zoo-na 2019 bilsini October jao pangchakaniko songahachim aro ia zoo-ko Chief Minister, Sonibar salo nina re·angtaiaha.
Zoo-ko nieani somoio ua officer-rangko grongenba, bangki dongenggipa kamrangko aro Central Zoo Authority (CZA)-chi recognize ka·aniko June 30-ni gisepon matchotatchina gita ge·etangaha.
Ia zoo-ko matchotatna gita rakbee kamrangko ka·china officer-rangko didiangengon, ia zoo-na tikitrangko, cha dokkanrangko aro dingtang dingtang dokkanrangko songni manderangna ba dolrangna on·china gitaba ua ku·pattianiko on·angaha.
“Meghalaya Zoological Park-ko angni nieanio anga namen chu·ongnikaniko man·aha. Ia zoo-ko bakan martchotna siengahani gimin tourist-na kulie on·na man·gnok. Ia zoo-ko India sorkari aro Central Zoo Authority ra·chakmanahaon chinga ia zoo-ko tourist-rangna kulie on·gnok. Ia zoo-ni samba jolrangon chinga a·bri doani, ropeway, children’s park, interpretation centre aro uandakgipa biaprangkoba kulina miksongenga,” ine Chief Minister parakataha.
Ri Bhoi a·jani Umtrew-o donggipa hectare 72 a·arango ia zoo-ko gong kror 35 korosrangchi rikengachim ine nikna man·a.
Ia zoo-ko rikani skanggipa bako, rokom 15 matburingrangko donchakani, Visitor’s Plaza, Cafeteria, Veterinary Clinic, Feed Store, Main Gate aro gipin kamrangkoba man·chapachim.
Ia zoo-ko matchotahaode, matchok, peru, se·el, makbil, matcha, matchapeng, huro, makkre aro uandakgipa ma·manti matburingrangko ia zoo-ona ra·bagnok ine official-rang u·iataha.