SHILLONG: Adita salrangna skang, Shillong songjinmao taxi sale cha·gipa mande sakgniko kragija dake dokani ja·man, dingtang dingtang biaprango so·sojengjeng ong·anirangko nikna man·engon, iani bidingo Home department aro Meghalaya Police-ni gita maming talatanirangko on·jaengani gimin a·doko songdongenggipa manderangna naljokaniko aro chel·chakaniko on·aniara a·dok sorkarini daitoan ong·achim ine Opposition Congress dolni MLA aro Congress Legislature Party (CLP)-ni dilgipa Ronnie V Lyngdoh parakataha.
A·doko songdongenggipa manderangna salo konta 24-de chel·chakanirangko on·na man·janai gimin iandakgipa so·sojengjeng ong·atani kamrangko champenganiara altua kamde ong·ja ine janapatengon, so·sojengjeng ong·atenggipa aro manderangko doka satanio jak donggipa manderangko rim·anide sorkarini daitoan ong·a maina dos dakgipa manderangko rim·e sasti on·genchimosa manderangni gisiko ka·dongataniko ra·bana man·gen ine Lyngdoh parakataha.
Shillong songjinmao ong·enggipa obostarangara apsan ba samba jolrangon ong·batenga ine janapatengon, ia biaprango police-rangni nirok sandianirangko bilakbatatchina Congress MLA dabiangaha.
Iandakgipa a·selrangni ja·dilko sandichina sorkariko didiatengon, kenchakna nangbatgipa biaprango CCTV camera-rangko dongenchimode manderang skatang dakna pa·jawachim aro dos dakgipa manderangko rim·na gitaba police-rangna altubatgenchim ine Lyngdoh parakataha.
Shillong songjinmani Police Bazar-o taxi driver sakgniko kragija dake dokani ja·man, dingtang dingtang biaprango so·sojengjeng ong·atani kamrangko bang·en nikna man·engahachim.
