SHILLONG: Roster system-ko ra·gatani bidingo a·doko songdongenggipa pilak manderangnaba u·iatchina gita Khasi Students Union (KSU), NPP-chi dilenggipa MDA sorkario dabiangaha.
“Sorkarini dakna miksongenggipani gimin da·o dipet a·doko songdongenggipa manderang aro dingtang dingtang dolrangde ma·sitokkujaenga, uni gimin pilak political dolrang baksa tom·anio mesoke on·anggipa roster system-ni bidingo jinmanaba u·iatchina chinga nangnikenga,” ine KSU-ni general secretary Donald V Thabah parakataha.
Iani bidingo apsan chanchirimna gita NGO-rangko aro songsalna kam ka·enggipa dingtang dingtang dolrangko sorkari okamna nanga ineba ua aganaha.
Thabah-ni parakatani gitade, da·o dipet iani bidingo chanchirimna gita uamang sorkarini okamataniko man·soa dongkujachim.
Cabinet Minister Ampareen Lyngdoh-chi dilenggipa committee-ni recommendation-rangkoba jinmana u·iatna nanga ineba KSU-ni general secretary dabiangaha.
Sorkarini proposal aro committee-ni recommendation-rangko jinmani nikaniona ra·baa ong·ode jinmanaba agan-ku·pattianirangko aro an·tangtangni chanchianirangko on·na gita cholko on·na nanga ine Thabah aganaha.
“Unosa a·doko songdongenggipa manderangni ra·chakgni gita sorkari ja·kuko de·na man·gen,” ine KSU-ni dilgipa parakataha.
Roster system-ko mikkangchinasa tarina nanga ineba ua dabiangtaiaha.
KSU-ni parakatani gitade, reservation ba biap kanganiko Khasi-Jaintia-rangna 50% aro Garorangnade a·bachengo gitan 40%-ko donna nanga ine uamang, 2007 bilsion dabianirangko dakahachim.
“2011 bilsini census-o pangchake Khasi-Jaintia-rangni mande jelbra jelsuani lak 13 gapaha aro Garorangni jelbra jelsuaniara lak 8-mangsan ong·aiaha. Khasi-Jaintiarangni jelbra jelsuani Garorangna lak 5-mangni gita batengani giminsa chinga Khasi-Jaintiarangnade biap kanganiko bariatchina dabienga,” ine Thabah parakataha.