SHILLONG: Assam aro Meghalaya a·dokni simarango meligrikna man·jaenggipa bangki damdok biaprangni bidingo dolgni agangrikaniko da·al Budbar salni bako Guwahati songjinmao a·bachengatanggnok.
Ia tom·aniko pring 11:00 bajioni, Guwahati songjinmani Khanapara-o donggipa State Guest House (Koinadora)-o ong·atenga aro ia tom·anio Assam-ni Chief Minister Himanta Biswa Sarma aro Meghalaya-ni Chief Minister Conrad K Sangma sakgnian bakko ra·anggen.
Ia tom·anio a·dok damgnini chief minister-rang baksana a·dok damgnini regional committee membor-rang bakko ra·anggen.
Tom·e chanchirimani ja·man, a·dok damgnini chief minister-rang, so·sojengjeng ong·enggipa Block-I aro Block-II jolrango tom·tomaniko rakkichina didina gita re·ange grongegen.
Assam aro Meghalaya a·dokni simao meligrikna man·jaenggipa bangki damdok biaprangara, Langpih, Borduar, Nongwah-Mawtamur, Deshdoomreah, Block- I, Block-II aro Psiar-Khanduli jolrang ong·engachim.
Re·anggipa bilsioba Assam aro Meghalaya sorkarirang, a·dok damgnini simarango meligrikna man·jaenggipa damdok biaprangni bidingo agangrikani ja·man, MoU-o soi ka·grikangahachim ine nikna man·a.
Ia MoU-ko soi ka·grikanio Meghalaya a·dokni mitam songrangkode Assam-o napatskaahani gimin ia songni manderang aro dingtang dingtang dolrang, a·dok sorkarini kosako raken jegalanirangko dakangskaahachim.