TURA: Meghalaya a·doko skanggipa changna Garo Hills Autonomous District Council (GHADC)-o tangka paisarangko jakkalsretahani gimin sak 10 MDC-rang baksana GHADC-ni gitcham secretary aro adita sak contractor-rangni kosako Meghalaya Lokayukta charge sheet ka·aha.
Charge sheet-ko ka·anio biming mingako man·gipa MDC-rang, officer-rang aro contractor-rangni kosako ja·kurangko de·na man·na gita Tura-o dingtangmanchagipa kachariko kulichina gitaba Lokayukta ge·etaniko on·angaha.
Kamrangko ka·gija District Council-ni tangka paisarangko oke ra·ahani gimin 2019 bilsio Williamnagar-ni social activist Nilbath Ch Marak, Asanang-ni gitcham MDC Ismail Marak aro contractor sakgni, chong·motan Nikseng Sangma aro Kubon Sangma-ni kosako Lokayukta-na badi ka·doangahachim aro uni badi ka·gipa case-ni bidingo knatimangani ja·man Meghalaya Lokayukta, GHADC-ni MDC-rang, gitcham official-rang aro contractor-rangko dosi chane raiko on·ataha.
Tangka paisarangko jakkalsretanina Lokayukta-ni charge sheet ka·anio biming mingako man·gipa manderangara, GHADC-ni gitcham chief executive membor (CEM) Boston Marak, gitcham MDC-rang, chong·motan Mark Goera Marak, Rightious Sangma, Jimbirth Sangma, Levastone Sangma, Winnison Ch Marak, Rupert Sangma, Kenedik S Marak, Dhormonath Sangma, Ismail Marak, GHADC-ni gitcham secretary Hewingson Sangma aro contractor sakgni, Nikseng Sangma aro Kubon Sangma ong·achim.
Ia case-ko Tura police station-ni investigating officer Walsall M Momin-ni dilanichi sandirokaha aro charge sheet-ko Lokayukta-ni chairperson Bhalang Dhar ka·skaaha.
Nilbath Marak-ni badi ka·aniko man·ani ja·man ia case-ko sandirokchina Meghalaya Lokayukta ge·etaniko on·angaha aro uandaken iani bidingo police-rang, bilsisamangna sandirokani dakon, ma·mong sorkarini chamatgipa gong kror 28 tangkarangko jakkalsretaha aro ia tangka paisarangko jakkalsretanio badi ka·ako man·gipa MDC aro contractor-rang baksana gipin MDC-rangba jak donga ine report-ko on·aha.
Inquiry report-ko man·soani ja·man, re·anggipa May-ni 18 tariko Meghalaya Lokayukta, kosako janapgimin gitcham MDC-rang, GHADC-ni gitcham secretary aro contractor-rangko dosi chane, uamangni kosako nanga gita ja·kurangko de·na man·na gita special court-ko songchina ge·etaniko on·ataha.
Comments are closed.