TURA: Dadenggre Civil Sub-Division-ni ning·o donggipa Fishery office-ni nok obosta namsrangjahani a·sel kam ka·enggipa officer-rang a·palrangosa kam ka·na nangengani gimin ia office nokko gital dake rikchina a·dok sorkarina sedoatgen ine Dadenggre-ni MLA Rupa M Marak parakataha.
Adita salrangna skang, ua ia office-ko re·ange nieanio, office-o kam ka·giparangko office nikejan baksana ia office nokni obosta namsrangjahanikoba ua nikbana gita man·ahachim.
Officer-rangni office-o asongjaengani gimin ua dingtangmancha West Garo Hills a·jani Deputy Commissioner Jagdish Chelani-na sedoatani ja·man da·ode officer-rang, office-ona re·ange kam ka·engahachim indiba office nok obosta dongjahani a·sel a·palosa asonge kamtangko ka·skana nangenga ine u·iataha.
“Da·ode fishery officer, office-tangona re·bae kamko ka·engaha aro iana anga kusi ong·a indiba office-ni obosta namsrangjahaniko nike anga namen suk ong·ja. Iani bidingo anga ta·raken sorkarina sedoatgen,” ine Marak parakataha.
Indake ong·engon, Tura aro Dadenggre-na apsan fishery officer-an kamko ka·na nangengani a·selsa Tura-oni ka·engachim ine Deputy Commissioner talataniko on·ataha.
“Tura aro Dadenggre-na officer saksansa kamko ka·engani a·sel ua Tura-oni kamko ka·engachim. Iani bidingo angna MLA u·iatani ja·man, anga fishery department-na u·iatskae, officer-rangko konibeoba antio salgni ba salgittamde Dadenggre-ona re·ange kam ka·atchina aganataha. Ia office nokko indita bilsirangna jakkalchipjahani a·sel iandakgipa obostaona sokaha,” ine Chelani parakataha.
