SHILLONG: Meghalaya a·dokni State Reservation Policy-ko gital dake nipiltaichina dabie Voice of the People’s Party (VPP)-ni dilgiparang, okumu chake jingjengataniko dakengon, NPP-chi dilenggipa MDA 2.0 sorkario bakrimenggipa United Democratic Party (UDP)-ba da·o chakpaaniko on·angskaaha.
Shillong songjinmani Main Secretariat mikkango okumu chake jingjengatenggipa VPP-ni president Ardent Miller Basaiawmoit-ko Bristibar salo, UDP-ni general secretary Jemino Mawthoh grongeaha aro reservation policy-ko gital dake nipiltaichina uamangni dabienggipana uamangni chakpaaniko parakeaha.
“UDP-ni MLA-rang, MDC-rang aro gipin dilgiparang, reservation policy-ko nipiltaichina sorkariko didigen,” ine Mawthoh parakataha.
KHADC-ni CEM aro UDP-ni dilgipa Titosstarwell Chyne-ba, reservation policy-ko nipiltaichina dabianio chakpaaniko parakatengon, reservation policy-ko name nina gita sorkari, dingtangmancha u·i-ma·sigipa manderangchi independent commission-ko songna nanga ine didianiko on·angaha.
“Niam gita reservation policy-ko bilsi 10-prakon nipiltaina nanga,” ine KHADC-ni chief executive membor aganaha.
Reservation policy aro roster system-ara nangchakegrikgiparang ong·a ine janapatengon, reservation policy gride roster system-ni gimin chanchina man·jawa ine Chyne parakataha.
Ian jatna nangchongmotgipa kam ong·ani gimin pilak political dolrang, dilgiparang aro NGO-rang ku·cholsan ong·na nangenga ineba ua aganaha.
