TURA: Ia 2023 bilsini Secondary School Leaving Certificate (SSLC) porikkao Garo Hills-oniba sakdok chatro chatrirang, Top 20-o biaprangko man·riktokaha aro uamangni chu·sokgipa ong·ani bidingo Salantini Janera-ba uamangoni adita sakko sing·sandiatna cholko man·aha.
Ia bilsini SSLC porikkao Sherwood School-ni Samridhya Das, Top 20-ni skanggipa biapko man·e a·dok gimikko amgopaha aro uni kobor ra·timgiparangna parakatani gitade, ua salantian konta gittammangna poraijringani a·sel ia namgipa biteko man·aha.
Samridhya Das, Tura-o ba·ra badingenggipa Swajan Kr Das aro Gita Das-ni saksakamkam depante ong·a aro an·tangni ia porikkao chu·sokgipa ong·ani bidingo talataniko on·angengon, ua an·tangni poraianio salantian gisik on·ahani a·selsa ia porikkaoba ua skanggipa biapko man·e chu·sokgipa ong·aha ine Samridhya parakataha.
Mikkangchi ua mai kamko ka·na miksonganirang donga ine sing·on, ua nuclear physicist ong·na skani dongenga aro da·o Tura Don Bosco College-o poraienba ja·mano engineering-ko dakna miksongenga ine Samridhya parakataha.
An·tangni chu·sokgipa ong·anina ua an·tangni skigiparangko aro ma·a paakoba mittelpilangaha.
An·tangni chatro chatriskarangna maiko ku·pattina sikgenchim ine sing·on, “Chatro chatrirang poraiengon pangnan gisiko nangna nanga. Na·a badita konta poraia uade maming ong·ja indiba poraianio gisik nangna nanga,” ine Samridhya aganaha.
Tura Sherwood School-ni sakgipin chatro Ritam Deep Chowdhury aro Tura St Xavier’s Higher Secondary School-ni chatri Salrime M Sangma sakgnian 564 mark-rangko man·e, Top 20-ni gittamgipa biapko man·skaaha.
Ritam Deep Chowdhury-ara, PWD (NEC Division) engineer Ram Chandra Chowdhury aro Mili Chowdhury-ni depante ong·a aro uaba ia porikkao Top 20-ni gittamgipa biapo pass ka·na man·ahani gimin an·tangni kusi ong·aniko parakataha.
An·tangni chu·sokgipa ong·na man·ani gimin talataniko on·angengon, uaba salantian konta 3 ba konta 4-na porairongani a·selsa iandakgipa biteko man·aha ine Ritam parakataha.
Mikkangchi mai kamko ka·na miksonganirang donga ine sing·anina aganchakaniko on·angengon, ua da·o gipin biapona re·ange chubata gadangrango poraianggen aro an·tangni pagipa gitan engineer ong·na gita Science-ko poraigen ine Ritam parakataha.
Uaba ia SSLC porikkao chu·sokgipa ong·na man·ahani gimin an·tangni skigiparangko aro ma·a paako mittelpilangaha.
Top 20-ni gittamgipa biapko man·e ka·anggipa St Xavier’s HS School-ni chatri Salrime M Sangma-na ia result-ara jumang gitasa ong·aha maina ua saksa me·su pale cha·gipa ma·gipani demechik ong·genchimoba, kamtango bimchipgipa ong·anichi aro kakket ong·e poraianichi ia porikkao iandakgipa gadangko man·e chu·sokgipa ong·aha.
Salrime-ni aganani gitade, ua St Xavier’s School-ni Garo Section-osa poraichengachim indiba uni tikkelanichi ua ia SSLC porikkako English-chi sena nanggenchimoba chu·sokgipa ong·na man·aha.
An·tangni chu·sokgipa ong·anina ua an·tangni skigiparangko, an·tangni ma·gipako aro mongsongbate una ka·dongatanirangko aro didianiko on·gipa skulni headmistress-ko Salrime mittelpilangaha.
Pangnan an·tango bebera·china aro kamtango bimchipgipa ong·china ua, an·tangni chatro chatriskarangna ku·pattianiko on·angskaaha.
Da·o ua Science-ko ra·e poraianggen aro mikkangchi Civil Services-o napna krenggen ineba Salrime parakataha.
Aeroville HS School-ni Ronggrik B Sangma, Top 20-ni brigipa biapko man·e chu·sokgipa ong·skaaha aro ua mikkangchi Mathematics skigipa ong·na miksonganirang dongenga ine parakataha.
An·tangni chu·sokgipa ong·anina Ronggrik, an·tangni skigiparangko, an·tangni ma·a paako aro nokdangni manderangkoba mittelpilataha.
Salo badita kontarangna porairongachim ine sing·on, ua indita kontarangna poraia inede aganna man·jawa indiba pangnan dikdikprak poraie, an·tangni lesson-rangko matchotna jotton ka·ronga ine Ronggrik parakataha.
Tura Sherwood School-ni sakgipin chatri Sanskriti Karmakar, Top 20-ni dokgipa biapko man·e pass ka·skaaha aro uaba ia porikkao chu·sokgipa ong·ahanina an·tangni skigiparangko aro ma·a paako mittelpilangaha.
Da·o ua Tura-ni Don Bosco College-o Science-ko poraiangna miksongenga indiba ua mikkangchi mai kamko ka·gen, ukode ja·mano chanchiaigen ine Sanskriti parakataha.
Salantian ua adita kontarangna porairongani a·sel ia porikkako name chu·sokna man·aha ineba Sanskriti parakataha.
Tura Aeroville HS School-ni sakgipin chatro Riktean M Marak, Top 20-ni 17-gipa biapko man·e pass ka·skaaha aro an·tangni chu·sokgipa ong·anina uaba Nokgipa Isolko, skigiparangko, ma·a paako, tuition skigipako aro ripengskarangko mittelpilangaha.
Uaba da·o Tura-ni Don Bosco College-o Science-ko poraiangna miksongenga indiba mikkangchi kam ka·gnini gimin chanchia dongkujaenga ine Riktean parakataha.
SSLC porikkana ua salo konta gittamoni konta bongamangna poraiaha ineba Riktean parakataha.
Pangnan an·tangtangni poraianio gisik nangchina gita uaba an·tangni chatro chatriskarangna ku·pattianiko on·ataha.
