NEW DELHI: Robibar salo, gital Parliament-ko nokdonggana siengon, opposition dolrangoni bang·batan iano bakko ra·na jegaltokengon, National People’s Party (NPP)-ba BJP-chi dilenggipa NDA sorkarini bak ong·paengani gimin ia gital Parliament-ko nokdonggaanio bakko ra·na gita a·dokni Chief Minister aro NPP-ni national president Conrad K Sangma, Bristibar attamon New Delhi-ona sokangaha.
Gital Parliament-ko nokdonggaanio NPP-ni saksakamkam MP ong·enggipa Tura-ni MP Agatha K Sangma-ba Sonibar salo New Delhi-ona sokanggen ine kobor on·aha.
Koborko on·ani gitade, a·dokni Chief Minister aro NPP-ni national president Conrad K Sangma, Sonibar salo pilak a·dokrangna ong·atenggipa NITI Aayog tom·anioba bakko ra·anggen.
National Democratic Alliance (NDA)-o bakrimenggipa dolrangoni BJP, BSP, Shiromani Akali Dal, Janata Dal (Secular), Lok Janshakti Party (Ram Vilas), YSR Congress, BJD aro TDP dolrangba ia gital Parliament-ko nokdonggaanio bak ra·anggen ine ka·dongsoenga.
BJP dol baksana NDA-o bakrimenggipa gipin dolrangara Shiv Sena, NPP, Nationalist Democratic Progressive Party, Sikkim Krantikari Morcha, Jannayak Janata Party, AIDMK, IMKMK, AJSU, RPI, Mizo National Front, Tamil Maanila Congress, ITFT (Tripura), Bodo People’s Party, Pattali Makkal Kacchi, MGP, Apna Dal aro AGP-ba bak ong·enga ine kobor on·timgiparang parakataha.
Indake ong·engon, Congress, Left, TMC, SP aro AAP-ko man·chape dol 19 opposition dolrang, ia gital Parliament-ko nokdonggaanio bak ra·jana gita tik ka·skaaha ine kobor on·aha.