TURA: Re·anggipa bilsiode Garo Hills gimiko Secondary School Leaving Certificate (SSLC) porikkako pass ka·ani 34 percent batangahaoba da·o ia bilsiode 31.94 percent-san ong·e pass ka·anio tang·onaniko nikna man·taiaha.
Garo Hills gimiko ia bilsini SSLC porikkako pass ka·a bang·batgipa 36.58 percent ong·e West Garo Hills a·jao ong·aha aro South West Garo Hills a·jao 26.72 percent ong·e komibatgipa ong·skaaha.
Garo Hills gimiko ia bilsini SSLC porikkako sak 22,925 chatro chatrirang seahachim indiba sak 7323 chatro chatrirangsan pass ka·na man·aiaha.
Garo Hills-o SSLC porikkako seanio pass ka·giparang komiengani gimin batanggimin bilsirangonin lekka porani gadangko namdapatna gita sorkari, dingtang dingtang dake ja·ku de·anirangko a·bachengatahachim indiba da·alona kingkingan maming namdapanirangko nikna man·skakujaengachim.
Indake ong·genchimoba, ia bilsini SSLC porikkao Sherwood School, St Xavier’s HS School, Aeroville HS School aro gipin skulrangoniba nambate dakskaanichi Garo Hills-na mikkim rasongko ra·baskaaha.
