Cong, sima arini skanggipa bakko matchotchengna dabia

SHILLONG: Sima ario meligrikgijagipa biaprangko namatna kam ka·anio gnigipa interstate boundary talk ba agangrikaniko a·bachengatani gimin, state Congress, sorkariko ‘gnigipa phase ba bakona re·angna skang, skangipa phase-ni mamlako namatsrangkuchina’ dabiataha.
“Skanggipa phase-o Assam aro Meghalaya-ni gisepo soi ka·gipa MoU-o bang·a gualanirang donga, ukon namatchengna nanga, uni ja·mansa gnigipa bakona re·angskao namgen, ine Meghalaya Pradesh Congress Committee (MPCC)-ni secetary aro Mawhati MLA Charles Marngar, aganaha.
Assam aro Meghalaya-ni Chief Minister-rangni gisepo soi ka·grikgipa MoU-ko traditional head ba song-nokni dilgiparang, NGO aro gipinrang bang·an namniktokjaenga, indaka somoio sorkari maidake gnigipa phase-ona re·angna man·a ine sing·ataha.
“Sorkari, manderangni kattako knachake ja·ku de·na nanga, iakosan anga agana sika.”
Gnigipa phase-o chanchirimna dongipa sima ari jolrangara- Langpih, Block 1 & 2, Khanduli-Psiar, Nongwah Mawtamur, Borduar aro Desh Doomreah, iarang ong·a.
Mija bilsi March jani 29 tariko Assam aro Meghalaya-ni Chief Minister-rang New Delhi-o ma·mong minister Amit Shah-ni dongpaanio MoU-ko soi ka·aha.
MoU-ko soi ka·ani ja·man sakbri traditional chief-rang- Hima Jirang-ni Syiem, Hima Mylliem-ni acting Syiem, Nonglang Sirdarship-ni Sirdar aro Hima Nongspung-oni acting Syiem- uamang MoU-ko jegale Meghalaya High Court-o case file ka·aha. Song-nokni dilgiparang baksa agangrikchenggija MoU-ko soi ka·aha ine matnangaha. Minggipin MoU, Sixth Schedule-ni provision ba niamko pe·a ineba aganaha.
High court, MoU-o soi ka·gimino donangkuchina ge·etaha. Uni gimin a·dok sorkari Supreme Court-ona ia mamlako ra·angaha, apsan daken stay order-ko on·angaha.