TURA: North Garo Hills a·jao donggipa Kharkutta constituency-ni gitcham MLA Omillo K Sangma aro Garo Hills-ni adita sak dilgiparang, Sonibar salo Aam Aadmi Party (AAP)-o napangaha.
Sonibar salo, AAP-ni North East in-charge Rajesh Sharma, Tura-ona re·baenba AAP-o napanggipa Garo Hills-ni dilgiparangko rimchaksoaha.
AAP-ni tom·aniko Tura Hawakhana-o donggipa Mondol Tilla Community Hall-o ong·atanio AAP-ni dilgipa Rajesh Sharma, jinmana aganprakangengon, indita bilsirangna salgro salaram a·dokrango maming namroro silroroaniko nikna man·jahani gimin ia jolrangoba AAP-ko nangchongmotengaha ine parakangaha.
Batanggimin bilsi 75-ni gisepo darang political dolrangan manderangni nanganirangko chu·sokate on·jaha aro political dolrang manderangna lekka porani, an·seng baljokani, bijoli, chi aro uandake nangchongmotgipa cholrangkon on·na man·jahani gimin iandakgipa nanganirangko chu·sokate on·na AAP-ko nangchongmotengaha ineba Sharma aganaha.
“Meghalaya a·doko tangka paisa jakkalsretanian gapaha aro manderang kamrangko ka·e cha·na cholrangko man·jaenga. Skul nok aro hospital-rangni obostarang namsrangjaha. An·ching Delhi songjinmako niatgenchimode da·alo Arvind Kejriwal-ni dilanichi maikai lekka pora aro an·seng baljokanio dingtanganiko ra·baaha nikatna man·gen. Da·alo Delhi songjinmao bijoli aro chirangko indin man·enga. Me·chikrang bus garirango indin songre songgabatna man·enga. Ia pilak kamrangkon AAP sorkari manderangna indin on·engoba Delhi sorkari maming noksan dongja batesa lapko man·enga,” ine Sharma aganaha.
Punjab a·doko AAP sorkariko chalaiani da·o bilsisasan ong·kuenga indiba ia bilsisani gisepon 580 Mohalla clinic-rangko aro dam 100-na baten mingsinggipa skulrangko chalaina a·bachengataha ineba AAP-ni NE in-charge parakataha.
“Punjab a·doko AAP sorkariko chalaiaoni da·o sak 26,000-na baten manderang sorkari kamrangko man·aha. Punjab a·dokni manderang da·o Delhi-ni manderangna baten, 300 unit-ni bijolirangko indin man·engaha,” ine Sharma aganaha.
Meghalaya a·dokoba iandakgipa dingtanganiko ra·bana nangenga ine ia tom·anio bak ra·gipa manderang, a·doko kakketgipa politics-ko ra·bana ine ku·mikchetanirangko dakangtokaha.
Ia tom·anio AAP-ni Meghalaya in-charge Sanjay Prajapati-ba jinmana aganprakangaha.