SHILLONG: Meghalaya a·dokni reservation policy-ko nipiltaina nangani somoi ong·engaha ine adita salrangna skang Mawhati-ni Congress MLA Charles Marngar-ni agananiko ian ua an·tangni chanchianiko agananisan ong·aia aro Congress dolni gitade ong·ja ine Congress dolni state working president Deborah C Marak talataniko on·angskaenba, reservation policy-ara namen ning·tue chanchina nanggipa kamsa ong·ani gimin uamang iani bidingo chanchirimna gita dingtangmancha committee-ko songna tik ka·angaha ine parakataha.
Reservation policy aro roster system-ni gimin a·dokni Congress dolba jajrengchakna nangani ong·enga ine janapatengon, iani bidingo ku·rangko on·jaenga ine manderang Congress dolko sing·doenga indiba iani bidingo Congress dol, baditaba chang chanchirimanirangko dakpaaha ine Marak parakataha.
A·doko Congress dolni donggipa committee, dingtangmancha somoiko ra·e name chanchirimchenggen aro ning·tue chanchianirangko dakani ja·man an·tangtangni resolution-ko manderangna u·iatgen ineba Marak parakataha.
Marak-ni aganani gitade, reservation policy gita dakgipa kamrangnade somoiko ra·na nangao ga·aka aro iandakgipa kamrangni giminde skatang ja·kuko de·na man·jawa.
Meghalaya a·dokni reservation policy da·o bilsi 50 batpilengaha aro Congress dolba ia reservation policy-ko gital dake nipiltaichina nangnikenga ine adita salrangna skangsan, Mawhati-ni Congress MLA Charles Marngar aganahachim.
Reservation policy-ko bilsi 10-prakon gital dake nipiltaichinaba ua ku·pattianiko on·angahachim.
Gipin a·dokrangde reservation policy-ko nipiltaironga ine janapatengon, Meghalaya a·dokoba reservation policy-ko nipiltaiani somoi ong·aha ine Marngar aganahachim.
