SHILLONG: State reservation policy-ko gital dake nipiltaichina dabie, Voice of the People’s Party (VPP)-ni president Ardent Miller Basaiawmoit, okumu chake jingjengataniko dakengon, Khasi Students Union (KSU)-ba reservation policy-ko nipiltaichina dabianio bakrimpaaniko on·angaha.
Robibar salo, KSU-ni dilgiparang, Additional Secretariat parking lot-o okumu chake jingjengatenggipa Basaiawmoit-ko grongna re·angenba, reservation policy-ko nipiltaichina dabianio bakrimpaaniko on·angaha.
VPP-ni president-ko reservation policy-ni bidingo agangrikna okamatchina gitaba KSU-ni president Lambokstarwell Marngar, Conrad K Sangma-chi dilenggipa a·dok sorkariko didiataha.
KSU president-ni parakatani gitade, reservation policy-ko gital dake nipiltaichina KSU-ba ru·uta bilsirangonin dabiengachim.
VPP-ni president-ko KSU-ni dilgiparang grongeani ja·man, VPP-ni dilgipa Ricky Syngkon, kobor ra·timgipa manderang baksa agangrikengon, roster system-ni giminde VPP-ni dilgiparang maming dabiani dongja indiba reservation policy-ko gital dake nipiltaichinasa a·bachengonin dabiengani gimin roster system-ni bidingo chanchirimna sorkarini songe on·gipa committee-o bak on·jawa ine parakataha.
Syngkon-ni parakatani gitade, Reservation policy-ko gital dake nipiltaichenggija Roster system-ni bidingo chanchirimna committee-ko songaniara maming namgni dongjaengachim.
Roster system-ni bidingo pilak political dolrang baksa tom·aniko ong·atangani ja·man a·dok sorkari, Cabinet Minister Ampareen Lyngdoh-ni dilanichi dingtangmancha roster system-ni bidingo kamko ka·dilna gita committee-ko songe donangahachim aro ia committee-o BJP-ni HM Shangpliang, TMC-ni Zenith Sangma, KHNAM-ni Pyndapborthiaw Saibon, INC-ni Ronnie V Lyngdoh, GNC-ni Augustine Marak, HSPDP-ni Methodius Dkhar, NPP-ni WR Kharlukhi aro UDP-ni Renikton Lyngdoh Tongkhar-ba membor ong·engachim.
