TURA: 1972 bilsio a·bachengatgipa Job Reservation Policy-o pangchake ua bilsioni da·ona kingking A·chikrangna dongenggipa backlog ba A·chikrangni man·na nangkuenggipa bak rengsirangko gapate on·kujaskal, a·dokni Reservation Policy-ko taridapani bidingo chanchina nangani katta dongja ine Zikku Balgra N Marak-chi dilenggipa Garo Students Union (GSU) parakataha.
A·dokni Job Reservation Policy-ko gital dake nipiltaichina dabie jingjengatanirangko dakengani gimin Voice of the People’s Party (VPP)-ni dilgiparangko matnangatengon, badia data-niko nie Khasi-Jaintia-rang an·tangtangni bak rengsiko man·jaenga ba man·jawa ine VPP-ni dilgiparang a·kangenga ine GSU-ni president sing·doatenba, Khasi-Jaintia-rangna bate Garorangan an·tangtangni bak rengsiko man·jaenga aro iako pilakan nikenga ine parakataha.
“Khasi chadamberang janggi tangani cholrangko man·jaenga ine VPP-ni dilgiparang a·kangenga indiba name niatgenchimode Garorangan cholrangko man·gijanide batenga. Uni gimin VPP-ni reservation policy-ko nipiltaichina dabianiara kakketko dongnue politics kal·na jotton ka·anisan ong·enga aro uamang indaken politics kal·e dongaigenchimode Meghalaya a·dokkoba Manipur a·dok gita ong·atgen,” ine Marak parakataha.
Indake ong·engon, batanggimin bilsi 50-ni gisepo A·chikrangni man·na nangkuenggipa kamrangni bidingo talataniko on·china aro special recruitment-ko dake A·chikrangni man·na nangkuenggipa pilak kamrangkon gapatchengchina gitaba GSU, a·dok sorkario dabiangaha.
A·chikrangni man·na nangkuenggipa kamrangko gapatkujaskal gipin jatrangna kam on·aniko dontongchengchina dabiangengon, Job Reservation Policy-ko a·dok sorkari nipiltaina nanggenchimode, Supreme Court-ni retired ba sitting judge-rangko songchina GSU dabiangaha.
Reservation policy-ko nipilna nanggenchimoba Khasi-Jaintia-rangna 40% aro Garorangna 40% kanganiode maming nangchakeani dongjachina gitaba GSU dabiangaha.
“Uni gimin A·chikrangni man·na nangkuenggipa kamrangko gapatkujaskal, reservation policy-ko taripiltaiani gimin chanchisrangnaba nangja aro iako manigija dakdragenchimode chinga A·chikrangni namgnina kachariona re·ange dakgrikgen,” ine GSU-ni president parakataha.
