TURA: Reservation Roster-ni bidingo chanchirimna gita Shillong-o ong·atna sienggipa tom·anio A·chik Conscious Holistically Integrated Krima (ACHIK)-ni dilgiparang bakko ra·ena gita jechakataha.
Iani bidingo Meghalaya sorkarini Joint Secretary-ba seachi u·iatengon, A·chik manderangna aro Garo Hills gimiknan Tura jillasa skotong ong·engani gimin Reservation Roster-ni bidingo A·chik dolrang baksa chanchirimna gita tom·aniko Tura-osa ong·atna nanga ine ACHIK-ni dilgiparang parakataha.
Tura-ko Winter Capital songchina dabienggipani bidingo janapatskaengon, iani bidingode dingtangsa tom·e chanchrimna gita nanggen aro ia dabianiko knachakjagenchimode Meghalaya a·doko songdongenggipa A·chik jat gimikni nangnikaniko nichanggalani gita ong·gen ine ACHIK parakataha.
Garo Hills-ni dingtang dingtang dolrang aro A·chik manderangna Reservation Roster-ni bidingo chanchirimna gita Tura-o tom·aniko ong·atchina didiatengon, “Meghalaya a·dokni Chief Minister Conrad K Sangma an·tangan roster system-ni bidingo a·ja ge·antini pilak dolrang baksa agangrikna man·aigen ine re·anggipa May 3 tariko aganmanahani gimin chinga uni kattarango bebera·e nisengenga,” ine ACHIK-ni dilgiparang parakataha.