TURA: West Garo Hills a·jani Rajabala police station ning·o donggipa Goalgao, Rongsangri, Peradanga songrango, niam gri ro·ong bikotani quarry aro ro·ong jetani karkanarangko chalaienga ine Federation of Khasi Jaintia & Garo People (FKJGP) Rajabala circle, Hollaidanga state forest department-ni range officer-na badi ka·doataha.
FKJGP Rajabala circle-ni president Samsen M Sangma-ni parakatani gitade, ia songrango niam gri ro·ong jetani aro ro·ong bikotani quarry-ko chalaiengani a·sel samba jolrango donggipa buring bolgrimrang porongrong ong·tokengaha aro ian mikkangchina namen kenchakna nangani ong·engahachim.
“Ian Indian Forest Act 1865, 1878 aro 1972 Act-o dongimin niamrangko pe·ani gitaba ong·enga. Uni gimin ia Goalgao, Rongsangri aro Peradanga songrango niam gri ro·ong jetani aro ro·ong quarry chalaianiko chinga FKJGP-ni gita raken jegalenga,” ine Sangma parakataha.
Ia ro·ong jetani karkana aro ro·ong bikotani quarry-rangko ta·raken chipatchina gitaba FKJGP Rajaba circle, Forest official-rangko didiataha.