SHILLONG: 1972 bilsini Job Reservation Policy-ko gital dake nipiltaichina dabie okumu chake jingjengatengani gimin iani bidingo agangrikna gita Voice of the People’s Party (VPP)-ni president Ardent Miller Basaiawmoit-ko okamatchina dolbri NGO-rang, chong·motan FKJGP, JSU, RBYF aro HNYF dolrang, NPP-chi dilenggipa MDA sorkariko didiataha.
Sombar salo, VPP-ni president Ardent Miller Basaiawmoit-ko grongeani ja·man kobor ra·timgipa manderang baksa agangrikengon, ua re·anggipa May 23 tarikonin okumu chake jingjengatengahani gimin a·dok sorkari, reservation policy-ko nipiltaiani bidingo agangrikna okamatna nanga ine FKJGP-ni president Dundee Cliff Khongsit parakataha.
“Somoiko ra·chae donggija VPP-ni president-ko ta·raken agangrikna okamatchina chinga nangnikenga. Basaiawmoit-ni okumu chake jingjengatani da·o antisa ong·pilahaoba sorkarini iandake gisik nanggija mesokaniko chinga raken jegalenga,” ine Khongsit aganaha.
Reservation policy-ko nipilchina dabianiara Basaiawmoit saksanni dabiani ong·ja indiba Khasi-Jaintia jatni ning·o donggipa nokdang ge·anti, ma·a paa sakanti aro chadambe sakantini dabianian ong·enga ineba FKJGP-ni president parakataha.
Indake ong·engon, reservation policy-ko gital dake nipiltaichina dabianiko sorkari knachakjagenchimode uamang, Khasi-Jaintiarangna dingtang a·dokko dabina draatako man·gen ine HYC-ni president Robertjune Kharjahrin parakatskaaha.
“A·dokni reservation policy da·o bilsi 51 ong·pilaha aro iako gital dake nipiltaichina chinga ru·uta bilsirangonin dabiengahachim. Ia dabianiara darang political dolrangna namgni ong·jawa,” ine Kharjahrin aganaha.
A·dokni chief minister, gipin jatoni ong·e reservation policy-ko nipilna sikjaengani gimin Khasi-Jaintia chadamberang ka·dongani gri ong·engaha ineba ua aganaha.
Tura-ko Winter Capital songchina dabienggipani bidingo janapatskaengon, ian Khasi-Jaintia Hills-rangna dingtang aro Garo Hills-na dingtang dake budget tarianisa ong·engaha ine HYC-ni president parakataha.
“A·dokko bak dakanikoba chingade ra·chakna kusi ong·aigen. Ian namen nangchongmotgipa kam ong·enga aro iako chinga maming an·chi pari nika gri chu·sokatna nangnikenga,” ine ua aganaha.