TURA: Mongolbar pringni 8:00 bajimango, Tura-ni Dakkopgre jolo dokkan ge·sao wa·al kamchakatani ja·man, ia biapo donggipa dokkan damgittamko chu·gimik wa·al kamgopaha.
Kobor on·timgiparangni u·iatani gitade, ia dokkanrangara petrol pump rama paksao donggipa dokkanrang ong·achim aro ia biapara CRPF camp sambao donggipa biapba ong·achim.
Ia dokkan ge·sao cylinder gas gopretani a·sel wa·al kamchakataha aro uandaken sambao donggipa dokkan ge·gnikoba chu·gimik kamchapaha ine kobor on·timgiparang parakataha.
Wa·al kamani koborko man·soa bakan Fire & Emergency Service-ni manderang, ua biapona re·bae wa·alko kimiteaha aro gipin biaprangona wa·al giproroanganiko champengatna man·aha.
Dokkan damgittamko wa·al kamanio komibeoba lak 5-mangni gita noksan ong·atako man·aha indiba rasong gnange wa·al kamanio darangba saknaanirangkode man·jaha ineba kobor on·aha.
Wa·al kamengmiting somoio manderang, bi·sarangko skulrangchi salangengmiting ong·enba ua biapo adita somoirangna ramao garirangni apchangket ong·anikoba nikna man·aha.
Kobor on·timgiparangni u·iatani gitade, wa·al kamako man·gipa dokkanrangara, cha dokkan, tyre dokkan aro kni ratgipa dokkan ong·achim.
