SHILLONG: Reservation policy-ni bidingo Voice of the People’s Party (VPP)-ni aganenggipa biapo ong·gija dingtang biapo jera ra·grikna gita da·o National People’s Party (NPP) ra·bianiko on·angskaaha.
Reservation policy-ni bidingo jera ra·grikna ra·bianiko ra·chakjaha ine VPP-ni dilgipa AJ Syngkon-ni agangipa kattarangni gimin janapatengon, “VPP-ni jera ra·na ra·bigipani bidingo anga songbadoniko poraimanaha aro ia reservation policy-ara constitutional ong·gipa ong·ani gimin anga ia jera ra·grikaniko National Law University (NLU)-o dakchina uko ra·biatskaenga,” ine NPP-ni state president aro Rajya Sabha-ni MP WR Kharlukhi parakataha.
May-ni 19 tariko St Anthony’s College-oni saksa DR Marbaniang minggipa mande una phone ka·ataha ine janapatengon, “May-ni 20 tariko VPP unbaksa college-o jera ra·grikna nangnikenga ine ua angna aganataha aro anga uko songbadrango seatchina VPP-na aganatkan ine aganatahachim indiba uamang mamingkoba dakskajaha,” ine Kharlukhi aganaha.
Reservation policy-ni bidingo jera ra·grike roana bate jinma chanchirimanikosa nangenga ineba ua aganaha.
“Constitution-ni Article 16 Clause 4-o nangegipa aro 1992 bilsio Supreme Court-ni rai on·anio pangchake 1972 bilsini January 12 tariko resolution-ko ra·ani gitade, reservation-o 50 percent-na batna man·ja aro iasa ia policy-ni mongsonggipa kattade ong·enga. Ian constitution-ni gita jera ra·grikani ong·enga aro na·simang angko ra·biahani gimin anga agenda-ko tarina bil donga. Na·simang angni ra·bianiko ra·chakna ka·donggen ine anga bebera·a,” ine NPP-ni state president parakataha.
Kharlukhi-ni parakatani gitade, ua aro VPP-ni ku·wattimgipa Batskhem Myrboh-ba law degree donggiparang ong·jachim.
“Ia jera ra·grikaniko nitimna anga salgro salaramni retired judge aro India a·songni gitcham Chief Justice ong·e ja·mano MP ong·anggipa mandeko judge dakchina ku·pattigen,” ine ua aganaha.
Ia jera ra·grikani chu·sokgipa ong·genchimode mikkangchi election changantian iandakgipa jera ra·grikanirangko ong·atna man·gen ineba NPP-ni state president parakataha.[IT_EPOLL id=”1″][/IT_EPOLL]
