SHILLONG: Meghalaya a·dokni Job Reservation Policy-o Khasi-Jaintia aro Garorangna apsan 80 percent-kon chaprime donchina gita Khun Hynniewtrep National Awakening Movement (KHNAM) didiangenba, kamrangko on·anio man·na nangani krisa on·china gita ku·pattiangaha.
Budbar salo, Reservation Roster-na songe on·gipa committee-ni tom·a matchotani ja·man kobor ra·timgipa manderang baksa agangrikengon, Khasi-Jaintia aro Garorangna apsan 80 percent-ko chamchina ku·pattianiko sorkari ra·chakjaenga ong·ode Khasi-Jaintia-rangna reservation-ko 50 percent-ona bariatskana nanga maina jelbra jelsuanio Garorangna bate Khasi-Jaintiarang batenga ine KHNAM-ni president Pyndapborthiaw Saiborne parakataha.
Khasi-Jaintia jolo donggipa a·jarango reservation 80 percent ong·na nanga aro apsan daken Garo Hills jolrangoba Garorangna reservation 80 percent ong·skana nanggen ineba KHNAM dolni dilgipa parakataha.
2022 bilsini May 10 tariko on·gipa office memorandum-ko a·dok sorkari taridapna nanga aro reservation policy-ko nipiltaikujaskal kamo ra·ani pilak kamrangkon dontongatna nanga ineba KHNAM president dabiangaha.
Indake ong·engon, a·dokni reservation policy-ko ru·uta bilsirangna skangonin gital dake nipiltaichina dabiengani gimin ia dabianiara gital dabiani ong·ja ine KHNAM-ni vice president Thomas Passah parakatskaaha.