AMPATI: South West Garo Hills a·jani Betasing Block ning·o donggipa Integrated Farmer’s Market Complex-ko Budbar salo, South West Garo Hills a·jani Additional Deputy Commissioner RZD Shira kulie on·angaha aro ia market complex-ko kulie on·anganio Betasing C&RD Block-ni BDO, District Horticulture Office-ni official-rang, dingtang dingtang department-ni official-rang, Integrated Farmer’s Market-ni committee membor-rang, Betasing Block-ni ning·o game ge·e aro bading chiwale cha·enggipa manderangba dongpae bak ra·angtokaha.
Ia Integrated Farmer’s Market-ko State Plan Scheme 2015-16-ni ning·o gong kror 8.18 aro Special Central Assistance 2014-15-ni gong kror 1.50 tangkarangchi rikaha aro ia market complex-ko 2017 bilsion nokdonggae on·ahaoba Budbar salosa kulie on·na man·aha.
Ia Integrated Farmers Market Complex-o game ge·e cha·giparangna dam 52 stall-rang, dam 44 traditional market shed, me·a aro me·chikrangna dingtang dingtang toilet aro uandakgipa dingtang dingtang cholrangkoba donaha.
Ia Integrated Farmers Market-ko kulie on·angani somoio SWGH a·jani ADC RZD Shira, jinmana aganprakangengon, ia farmer’s market-ko da·o kulie on·na man·ahani gimin an·tangni kusi ong·aniko parakatenba, ia farmers market-ko 2017 bilsion nokdonggaahaoba dingtang dingtang a·selrangchi kuliningna man·jaha ine parakataha.
“Manderang pilakan janggi tangna gita game ge·e cha·giparangosa pangchaktoka aro game ge·e cha·giparangko an·ching name nirok sandijagenchimode an·chingni a·ja ba ia jolrang namroro silrorona man·jawa,” ine Shira aganaha.
Ia market complex-ko rongtal an·tale rakkichina didiangengon, ia biapko an·tangni gnigipa nok dake chanchienba name chalaichina gita Shira, game ge·e cha·giparangko aro palbadinge cha·enggiparangko didiangaha.
Game ge·e cha·giparang aro badingenggipa manderang, ramarangosa aro bol salakimrangosa an·tangtangni bosturangna palna nange neng·nikanirangko man·na nangengachim ine janapatengon, da·ode ia farmers market complex-ko kuliahani gimin uamang nambate pale cha·na man·gnok ine Shira parakataha.
Ia Integrated Farmer’s Market complex-ko kulie on·angani somoio jinmana aganprakanggipa gipin manderangara, Betasing Block-ni BDO CRN Sangma, SWGH a·jani District Horticulture Officer D Nongkhlaw aro gipinrang ong·a.
