SHILLONG: 1972 bilsini State Reservation Policy-ko gital dake nipiltaichina dingtang dingtang dolrang dabitokengon, Reservation policy-ni bidingo chanchirimna gita Law, Economics, Survey aro Statistics-ni kamrango u·i-ma·sigipa manderangchi dingtangmancha expert committee-ko songna reservation roster-na songgipa committee tik ka·angaha.
Reservation roster-ni bidingo chanchirimna gita Law Minister Ampareen Lyngdoh-ni dilanichi, dingtang dingtang political dolrangko man·chape dingtangmancha committee-ko songe donangahachim aro uandaken Budbar salo ia committee, dingtang dingtang political dolrang baksa tom·e chanchirimangani ja·man, reservation policy-ni bidingo chanchirimdilna gita expert committee-ko songna manchiangaha.
Committee-ni tom·a matchotani ja·man kobor ra·timgipa manderang baksa agangrikengon, reservation policy-ko nipiltaiani bidingo chanchirimna gita dingtangmancha expert committee-ko songna tik ka·aha aro ia expert committee-o law, economics, survey aro statistics-ni u·i-ma·sigipa manderangkosa donna nangenga ine Lyngdoh parakataha.
“Ia tom·anio mitam dolrang, ia committee-ni gimin ta·raken u·iatchina aganaha aro mitamrangde name chanchipiltaichina aganskaahani gimin chinga name talbrekujaenga. Indake ong·genchimoba, chinga je ia tom·anio bang·en ka·donganirangkoba man·ahani gimin ian a·dokni manderangna namgni ong·gen ine chinga ka·dongenga,” ine reservation roster committee-ni chairperson aganaha.
Reservation policy-ni bidingo pilak dolrangan dingtang dingtang chanchianirang donga ine janapatengon, “Mitam dolrangde da·o dongenggipa reservation policy-kon ja·rikchina aganaha aro mitamrangde iako nipiltaichina aganskaaha. Indiba da·o dipet pilakan ku·sikmangmangchisan aganengkua,” ine Lyngdoh parakataha.
Committee-ni changgipin tom·aniko antigittamni ja·man ong·attaigen ine u·iatengon, pilak political dolrangkon an·tangtangni chanchianirangko seachi da·o sal 15-ni gisepon on·atchina ge·etangaha aro ja·mano ia ku·pattianirangko sorkari nipilanggen ine Law Minister parakataha.
Dingtang dingtang political dolrang baksa name chanchirimna man·ahani gimin Voice of the People’s Party (VPP) president Ardent Miller Basaiawmoit-ni okumu chake jingjengataniko dontongchina ia committee mol·molataha ineba Lyngdoh parakataha.