SHILLONG: Meghalaya a·doko Reservation policy-ni roster-ko ra·gatkujaskal pilak department-rangon kamo ra·aniko a·dok sorkari dontongatchengaha.
Iani bidingo talataniko on·angengon, a·dokni reservation policy aro roster system-ko a·doko songdongenggipa pilak manderangan ra·chakna man·kujaskal pilak department-rangon kamo ra·aniko dontongchengna nanggen ine a·dokni Cabinet Minister aro Reservation Roster committee-ni chairperson Ampareen Lyngdoh parakataha.
Pilak department-rangon kamo ra·aniko dontongchengchina gita Budbar salosan a·dok sorkari, dingtangmancha seachiba u·iataniko on·angahachim.
Indake ong·engon, reservation policy-ni roster-ko pilak dolrang aro a·doko songdongenggipa manderang ra·chakna man·ahaon, sorkari u·iataniko on·anggen ine Lyngdoh parakataha.
Reservation policy aro roster system-ko ra·gatanio pilakni nangnikani aro chanchianiko ra·na nanggen ineba ua aganaha.
“Uni gimin ia kamo an·ching pilakkon rimnapna nangenga. Saoba maiba neng·nikani dongenga ong·ode uamang uko mesokchina aro an·ching da·o antigittammangni ja·man apsan kamko ka·e iani bidingo nambate ma·sina man·gnok. Indiba da·o dipet pilakni namnikaniona sokkujaskal kamo ra·aniko dontongchengna committee tik ka·ahani gimin an·ching niam gita kamko ka·anggen,” ine ua aganaha.
