BAGHMARA: World Environment Day-ko manisamsoani bak gita South Garo Hills a·jao bol ge·ani aro dingtang dingtang program-rangko ong·atengon, Sukrobar salo South Garo Hills District Horticulture Department-ni gita World Honey Bee Day-ko Baghmara-ni DRDA Training Hall-o ong·atangaha.
Ia program-ko ong·atanio South Garo Hills a·jani Deputy Commissioner S Awasthi, jinmana aganprakangengon, bijarangni gamchatgipa ong·ani gimin janapangenba, bijarangko jilanichi gama ge·anirangoba bang·en namgniko man·a ine parakangaha.
“South Garo Hills a·jao samtangtango ong·telaigiparangan gapa aro gama ge·anirangoba bang·en cholrang donga. Bija jilanichi an·ching gama ge·ani bosturangkoba nambate man·na ama,” ine Awasthi aganaha.
Iandakgipa program-rangko ong·atengani gimin Horticulture department-ko mittelpilangengon, mikkangchiba iandakgipa program-rangko ong·atanio pilak nanga dakchakanirangko on·anggen ine South Garo Hills a·jani Deputy Commissioner, ku·rachakaniko on·angaha.
Ia program-ko ong·atanio dongpae jinmana aganprakanggipa gipin manderangara, NABARD-ni DDM Khelchandra Chongtham, DCIC-ni Project Manager CD Sangma, District Horticulture Officer TM Momin, MBMA-ni DPM BK Sangma, Horticulture Development Officer (Hqr) CD Sangma aro gipinrang ong·a.
Ia program-ko ong·atanio NE’ KHAT THI bija bitchikoba oprake on·angjolaha aro dingtang dingtang Honey Bee Stall-rangkoba donangaha.
