TURA: Job Reservation Policy-ni bidingo manderangko dilsrete Voice of the People’s Party (VPP)-ni president Ardent Miller Basaiawmoit, Khasi aro Garorangni gisepo ding·chaogrikaniko ra·bana jotton ka·enga ine Rongrong constituency-ni Trinamool Congress (TMC) MDC Rinaldo K Sangma matnangataha.
“Meghalaya a·dokko man·chengaonin Khasirang, bang·bate namgnirangko man·enga aro ia pilakkon an·ching dingtang dingtang department-ni data-rangonikoba nikna man·engachim. Indake ong·genchimoba, VPP-ni MLA Ardent Miller Basaiawmoit, manderangko dilsrete, Khasi aro Garorangni gisepo meligrikgijaniko ra·bana jotton ka·enga,” ine Sangma parakataha.
Dingtang dingtang department-rango see rakkigipa data-rangoniko nigenchimode Garorang, pilakni gitan an·tangtangni man·na nanggipa bak rengsiko man·jaha ine nikna man·gen ine janapatengon, iani giminsa High Court, reservation policy-ko kakket aro bebeo ja·rikchina gita roster system-ko ra·gatchina rai on·aha ine TMC MDC parakataha.
“Ardent Basaiawmoit-ni bamani gri aro gisik gri dake mesokaniara Meghalaya a·doko dingtang dingtang jatrangni meli nangrime janggi tanganiko nisigalna miksonganiko mesokani ong·enga. Ua saksa dilgipa ong·e iandakgipa kamrangni biteko ma·sina nangachim. Reservation policy-ko uni nipiltaichina dabianiko anga raken jegalenga aro ia policy-ko gital dake nipiltaina skangde Garorangni man·na nangenggipa bak rengsirangko gapatchengna nanggen,” ine Sangma parakataha.
Iandakgipa obostao nambatgipa cholde, Meghalaya a·dokko man·na krengdilanggipa pagitchamrangni ku·rachakgimin gita Tura-ko Winter Capital songanian ong·skaenga ineba Sangma parakataha.
Da·o dongenggipa Reservation policy-kon ja·rikangkuchina ku·pattianiko on·angengon, a·doko dingtang dingtang jatrangko tom·tomao janggi tangangkuchina gita Rongrong MDC didiataha.
