TURA: 2017 bilsio songgipa Raksamgre Civil Sub-Division-ni administrative building-ko Raksamgre a·kingni a·aon rikchina gita Raksamgre-ni dingtang dingtang dolrang, chong·motan AYWO, FKJGP, GSU, NGCO, ASWA, AHAM, Mothers Union, Senior Citizens Forum, A·king Nokmarang aro uandakgipa dolrang, a·dok sorkario dabiangaha.
Iani bidingo a·dokni Chief Secretary-na sedoatengon, Raksamgre jolo songdongenggipa manderangni namgnina Raksamgre, Napakgre aro Gondagre A·kingni Nokmarang, Raksamgre Civil Sub-Division-ni administrative building-ko rikna a·arangko on·giltokaha indiba ia a·arangoni administrative building-ko rikna gita Raksamgre A·kingni a·an nambatgipa ong·enga ine Raksamgre jolni NGO-rang aro Nokmarang parakatenba, Raksamgre Civil Sub-Division-ni administrative building-ko Raksamgre A·kingni a·aon rikchina didiataha.
“Raksamgre Civil Sub-Division-ko 2017 bilsini April 24 tariko, a·dokni gitcham Chief Minister Dr Mukul M Sangma, songe on·angaha aro uandaken Raksamgre Civil Sub-Division-ni general administrative building-na pangchakaniko 2022 bilsini September 23 tariko da·o ong·enggipa a·dokni Chief Minister Conrad K Sangma, da·o ong·enggipa Meghalaya Assembly-ni Speaker aro North Tura-ni MLA Thomas A Sangma-ni mikkango songe on·angaha. Raksamgre Civil Sub-Division-ni ning·o 44-Raksamgre aro 45-Tikrikilla Assembly Constituency-rang donga aro ia sub-division-ni ning·o dam 44-na baten songrang donga. Raksamgre-on mongsonggipa office-rang, skulrang donga, jekai post office, GHADC Inspection Bungalow, GHADC Range office, Raksamgre Higher Secondary School aro uandakgipa skulrangba donga,” ine Raksamgre-ni NGO-rang aro A·king Nokmarang parakatenba, Raksamgre Civil Sub-Division-ni administrative building-ko Raksamgre A·kingni a·aon rikchina sorkariko didiataha.