TURA: Ia jani gisepo ong·atna sienggipa CUET aro NEHU-ni porikkarang apsangrik ong·angenganichi chatro chatrirang neng·nikanirangko chagrongna sienga ine Zikku Balgra N Marak-chi dilenggipa Garo Students Union (GSU) parakatenba, ia CUET aro NEHU porikkani tarikrangko niatchina gita a·dokni Chief Minister Conrad Sangma-ko didiataha.
Iani bidingo a·dokni Chief Minister-na sedoatengon, CUET porikkako re·baenggipa June 12 tariko (Geography-ko afternoon shift-o), Shillong ba Guwahati songjinmao ong·atna siengon, salgipin June 13 tarik pringon NEHU porikkakoba seskana nangenga ine GSU-ni president Zikku Balgra N Marak talataniko on·angenba, ian CUET porikkako segipa chatro chatrirangnade ong·na amgijani ong·skaenga ine parakataha.
“CUET porikkako June 12 attamo Guwahati ba Shillong-o see, walni gario Tura-ona re·bapile pringgipino NEHU porikkako seaniara chatro chatrirangna ong·na amgijani ong·enga. Uni gimin chatro chatrirangni namgnina CUET ba NEHU porikkani tarikko dingtangatchina chinga mol·molatenga,” ine Marak parakataha.