SHILLONG: Meghalaya a·dokni mitam private skul aro college-rang admission fee-rangko rakdugae ra·enga ine koborrangko man·soahani gimin iandakgipa skulrangna a·dokni Education department, mikrakataniko on·ataha.
A·dokni Education Minister Rakkam A Sangma-ni parakatani gitade, a·dokni badiaba badiaba private skul aro college-rango admission fee-rangko rakdugae ra·engani a·sel chatro chatrirang neng·nikanirangko chagrongna nangtokenga ine mitam NGO-rang, una badi ka·doangahachim.
Iandakgipa skul aro college-rangni kosako Education department, rakgipa ja·kurangko de·anggen ine mikrakataniko on·angengon, a·doko poraienggipa chatro chatrirangni namgnina Education department, tom·e chanchirimenba nanga gita ja·kurangko de·anggen ine Sangma parakataha.
Chatro chatrirangni neng·nikanirangko ma·sichakchina private institute-rangko didiatengon, Meghalaya a·doko bilsiantian chatro chatrirang bang·batrorobaengani gimin chatro chatrirangna chubata gadangni lekka porako on·na gita a·doko donggipa skul aro college-rang chu·ongjaenga ine Education Minister parakataha.
“Elementary level-ode an·chingo nanga gita skulrang donga indiba higher education-ode an·ching skul aro college-rang chu·ongjae neng·nikanirangko chagrongna nangenga,” ine Sangma aganaha.
Meghalaya a·doko sorkari skul aro college-rang chu·ongjaengani gimin sing·on, a·dokni dingtang dingtang biaprango sorkari, community college-rangko kulina a·bachengengaha ine Education Minister parakatskaaha.