TURA: Ia sal somoirango gipin biaprangoni re·bae nangchongmotgipa lekkarang gri bosturangko palbadinge cha·enggipa manderang batroroengani gimin iandake niam gri bostu palgipa manderangko an·tangtangni gittimrango napna on·jachina gita Tura-ni MDC Bernard N Marak, dingtang dingtang gittimrango songdongenggipa manderangko didiataha.
Marak-ni parakatani gitade, adita salrangna skangsan ua mattress (tosok) palbadinggipa mandeko gronge uni mattress-rangko nion, uni palenggipa mattress-rangara namen cheng·gipasa ong·a ine ua nikna man·ahachim. Ia mandeni palenggipa mattress-rang namen cheng·ani gimin uamang mattress-ko rate nion, ia mattress-ora turmocol-kosan on·e uko ba·rachi kodapaiahachim ine ua nikna man·aha.
“Gipin biaprangoni re·bae niam gri bostu palbadinge cha·enggipa manderang, songni nokni manderangko cha·bokna jotton ka·enga aro iandakgipa manderangko an·ching champengna nangchongmotenga. Ia manderang, nangchongmotgipa licence grisa bosturangko palbadingenga aro ia manderang bostu namgijakosa songni nokni manderangna aro dingtang dingtang gittimni manderangna palna jotton ka·enga,” ine Tura-ni MDC parakatenba, iandakgipa manderangko gittimtangtango aro songtangtango napna on·jachina manderangko didiataha.