TURA: Sonibar walo aro Robibar pringoba West Garo Hills Anti Narcotics Task Force (ANTF)-ni official-rang, Phulbari-ni Rajpur songo niam gri sam badingenggipa mande saksani nokoniko am·sandienba, pekatgipa samrangko rim·na man·aha aro ia samrang baksana nok nokgipako man·chape gimik mande sakbriko rim·na man·aha.
Koborko on·ani gitade, Phulbari-ni Rajpur songo adita sak manderang niam gri pekatgipa samrangko badingenga ine koborko man·soani ja·man ANTF-ni official-rang, Sonibar walonin saksa Aziar Mondal minggipa mandeni nokoniko am·sandina a·bachengaha aro uandaken Robibar pringo ia nokoniko ganja kg 2.5, heroin gram 4.5, Yaba tablet rong 620, Tramadol tablet rong 39, Nitrazepam tablet rong 29, tangka gong 67,840, mobile phone ge 9, ML-08 0156 TVS Apache Bike bolsa aro adita bosturangko man·aha.
Iani bidingo police-rang aro ANTF official-rang, mande sakbriko rim·aha aro rim·ako man·gipa manderangara, Phulbari Rajpur songni bilsi 44 ong·gipa Aziar Mondol, apsan songni bilsi 25 ong·gipa Ziadur Mondol, bilsi 20 ong·gipa Riazul Mondol aro bilsi 35 ong·gipa Zobeda Bibi ong·a.
Iani bidingo police-rang ning·tue am·sandianirangko dakengkua ineba kobor on·aha.
