TURA: Tura-ko Winter Capital songchina dabienggipani bidingo A·chik Holistic Awakening Movement (AHAM)-ni dilgiparang, Robibar salo a·dokni Chief Minister Conrad Sangma-ko grongenba gisik ra·ataniko on·angtaiaha.
AHAM-ni president George Prince Cheran Momin-ni parakatani gitade, re·anggipa bilsion uamang, Chief Minister aro a·dokni Governor-naba iani bidingo u·iatahachim indiba da·alonan maming aganchakanirangko man·kujaengani gimin changsataie Chief Minister-ko gronge gisik ra·ataniko on·angtaiaha.
“Meghalaya a·dokko man·chengani somoion October jaoni March jaona Tura-ko Winter Capital dake, April jaoni September jaona Shillong-ko Summer Capital dakna gita a·dokni dilgiparang songgrikaniko dakahachim indiba ia songgigrikaniko batanggimin sorkarirang chu·sokatchipkujae da·onan Tura-ko Winter Capital songkujaenga,” ine Momin parakataha.
Tura-ko Winter Capital songchina Chief Minister-ko didiangengon, Khasi aro Jaintiarangoni A·chikrangara daka rikanio, ku·agananio aro janggi tangani bewalo namen dingtanggrikani giminsa Meghalaya a·dokko man·chengaonin Tura-ko Winter Capital songe, Shillong-ko Summer Capital dakskana pagitchamrang tik ka·ahachim indiba a·dokko man·chengaonin Shillong-ko Meghalaya a·dokni skotong songjinmana dakaiahani gimin pilak kamrangon Khasi-Jaintiarangsa namgnirangko man·bataiaha aro Garorangde pilakni gitan ja·manchakna nangaha ine AHAM-ni president parakataha.
“Tura-ko Winter Capital songgenchimode Garo Hills-ba sorkarini kamrango sepangbatatako man·e pilakni gitan tang·dopana man·gen aro Garorangni janggi tanganioba dingtanganiko nikpana man·genchim. Jammu & Kashmir, Himachal Pradesh, Andhra Pradesh aro uandakgipa gipin a·dokrangoba biap damsakosan skotong songjinma songaigija gipin biaprangkoba skotong songjinma songahani gimin namroro silroroaniko nikna man·enga,” ine AHAM parakatenba, Tura-ko ta·raken Winter Capital songchina a·dokni Chief Minister-ko didiataha.
