SHILLONG: Common University Entrance Test (CUET)-ko seenggipa Meghalaya a·dokni mitam chatro chatrirang, gipin a·dokrangosa sena gita nangenga ine koborrangko man·soahani gimin a·dokni chatro chatrirang, ia CUET-ko a·doktangon sena man·na gita CUET centre-rangko chu·onga gita kulidape on·china Khasi Students Union (KSU), a·dok sorkariko didiataha.
KSU-ni education secretary Pynkmenlang Sanmiet-ni parakatani gitade, adita salrangna skang uamang Education department-ni Secretary Ambrose Ch Marak-ko grongenba, a·doko CUET-ko sena sikenggipa chatro chatrirangna a·doktangon CUET centre-rangko on·china didiangaha.
Iani bidingo Education officer, kamko niatna gita ku·rachakataha ine janapatengon, Meghalaya a·dokna CUET centre-rangko on·china didie, ua apsan salon Education department, National Testing Agency (NTA)-ni Director-na sedoataha ine KSU-ni education secretary, an·tangni kusi ong·aniko parakataha.
Meghalaya a·dokni bang·a chatro chatrirangan, Guwahati, Itanagar, Kolkata ba Dimapur-osa CUET-ko sena nangtokenga ine janapatengon, a·doko CUET-rangko chu·onga gita NTA-ni kulie on·jahani gimin KSU-ni dilgipa, suk ong·gijanikoba parakataha.
Mitam chatro chatrirangde ia biaprangona songreangpana gita chol ong·jani gimin CUET-ko serikna man·pajawaha ineba ua suk ong·gijaniko parakataha.
“CUET porikkani tarikrang gipin porikkarang baksa apsan ong·enga ineba chinga nikna man·aha aro ian mitam chatro chatrirangnade a·songni gipin biaprango chubata gadangrango poraipana chol ong·jawaha,” ine Sanmiet aganaha.
June 5 tarikoni 17 tarikona ong·atenggipa CUET porikkako a·dokni chatro chatrirangba serikpana chol ong·na gita iani bidingo NTA baksa agangrikchina ua a·dok sorkarikoba didiataha.
