SHILLONG: Ma·mong sorkarini National Education Policy (NEP)-o pangchake Meghalaya a·dokni State Education Policy (SEP)-ko a·dokni Education department taritaipilgen ine parakatenba, Secondary School Leaving Certificate (SSLC) Class 10 porikkako bon·atgenma bon·atjawa name nichenggen ine talataniko on·angaha.
NEP-o pangchake Class 10 porikkade inditana nangchongmotgipa ong·jawaha ine nikenba Assam a·dokode re·baenggipa bilsioni HLSC Class 10 porikkako bon·atna gita Secondary Education Board of Assam (SEBA) tik ka·angahachim ine nikna man·a.
Indake ong·engon, Meghalaya a·dokoba NEP-o pangchake SSLC porikkako bon·atgenma bon·atjawa, department-ni gita asonge chanchichengna nanggen ine a·dokni Education Minister Rakkam A Sangma parakataha.
Education Minister-ni parakatani gitade, Meghalaya a·doko NEP-ni gita apsan niamrangkode ja·rikna man·jawa maina a·dokode dongimin niamrang donga aro dingtang dingtang neng·nikanirangba dongaigen.
A·dokni State Education Policy-o NEP-ni mitam niamrangko chape taridapgen ine janapatengon, a·dokna nangani kri aro chatro chatrirangna namgni ong·nagipa niamrangkosa a·dokni Education Policy-o ra·chapgen ine Education Minister parakataha.
NEP-ko ja·rikanio man·enggipa neng·nikanirangko janapatengon, ia neng·nikanirangko namatna gita cholrangde dongaigen aro NEP 2020-ni biding national seminar gita dakgipa program-rangko a·doko ong·atahani gimin da·o ia jani 13 tariko Mawkyrwat-oba apsan dakgipa program-ko ong·atna sienga ine Sangma parakataha.
NEP-ko ja·rikanio chagrongna nangenggipa neng·nikanirangko janape on·na gita ua bakan Union Education Minister-ko grongegen ineba Sangma parakataha.
Common University Entrance Test (CUET)-ko seanio a·dokni chatro chatrirang neng·nikanirangko chagrongna nangenggipani bidingo janapatskaengon, a·doko CUET centre-rangko kulidapchina gita a·dok sorkari, National Testing Agency (NTA)-na u·iatmanaha ine Education Minister parakataha.
