SHILLONG: 2021 bilsio Shillong-o donggipa Food Corporation of India (FCI)-ni bosta lak 1 merongrangko Kamrup a·jani Boko-o donggipa private godown-oniko rim·ani ja·man ia merongrangko ong·gija kamrangna jakkalsretaha ine matnanganiko Budbar salo, Meghalaya a·dokni Social Welfare Minister Paul Lyngdoh jegalatenba, iani bidingo matnanganiara maming pangchakani gri matnanganisan ong·aia ine talataniko on·angaha.
Merongrangko ong·gija kamrangna jakkalsreta ine matnanganiko jegalatengon, iani bidingo name am·sandichina a·dok sorkarini pakwate on·angani ja·man, Meghalaya a·dokni Account General (AG)-ba ia matnanganio maming kakket ong·aniko nikna man·jaha ine Lyngdoh talataniko on·angenba, iandake matnanganirangara kakket ong·ja ine parakataha.
“Merongrangko jakkalsreta ine matnanggipani bidingo AG-ni am·sandianio maming pangchakanirangkon man·jaha ong·ode maikai iako ‘Rice Scam’ ine aganna man·gen?” ine Lyngdoh sing·doataha.
Social Welfare Minister-ni parakatani gitade, Law department-ni raiko ra·ani ja·man ia a·selni bidingo am·sandie kakketko ma·sina man·ahaoba Assam police baksa name agangrikna man·jae ia case-ko am·sandianio ja·manchakatako man·ahachim.
“Uni gimin mikkangchide iandake maming pangchakani gri matnanganirango badiaba badiaba dolrang aro department-rang biming man·jana gita inquiry-rangko dakanio somoiko donna nanggen,” ine Lyngdoh parakataha.
2021 bilsini June jao, Shillong FCI-ni bag lak 1 merongrangko Assam a·dokni Boko-o donggipa private godown damsaoniko rim·ahachim. Ia merong bostaprakon kg 50 merongrang dongani gimin iano krorni kror tangkarangko jakkalsretaha ine matnanganirangko nikna man·ahachim.
Ia merongrangko rim·ani ja·man Meghalaya sorkarina u·iatskaon, ian Meghalaya a·dokni public distribution system (PDS)-ode maming nangchakeani dongja ine a·dokni Chief Minister Conrad K Sangma parakatskaahachim.
