SHILLONG: Gital Meghalaya Legislative Assembly-ko songaoni da·o jagittam ong·angpilani ja·man, Assembly-ni Leader of Oppostion (LO) ba Opposition dolni dilgipa baksana Opposition dolni Chief Whip-ko Bristibar salo, Assembly Speaker-ni office songe on·angaha.
Meghalaya Legislative Assembly-ni Commissioner & Secretary Andrew Simons-ni seachi parakatani gitade, Congress Legislature Party (CLP)-ni dilgipa Ronnie V Lyngdoh-ko Opposition dolni dilgipa songaha aro Gambegre-ni Congress MLA Saleng A Sangma-ko Opposition-ni Chief Whip songskaaha.
Gital Meghalaya Assembly-ko songaoni baditaba jarang ong·pilahaoba, Leader of Opposition (LO) ba Opposition dolni dilgipako Assembly-ni Speaker songchipkujani gimin, opposition dolo membor-rang bakdokoni baksa ong·na nanga ine maming niamrang dongja aro batanggimin somoirangoba iandakgipa obostarangko nikna man·ahachim ine adita salrangna skangsan a·dokni Congress dol parakatahachim.
Opposition dolni dilgipako seokaniara Assembly Speaker-ni daitoan ong·a ine talataniko on·angengon, “Haida ua ain aro niam bidikni gimin u·i-ma·sigipa manderangni ku·pattianirangko ra·engakon,” ine Congress Legislature Party (CLP)-ni dilgipa aro da·o Opposition leader-na songako man·gipa Ronnie V Lyngdoh parakatahachim.
“Skango UDP-ni membor-rang chu·ongjagenchimoba Dr Donkupar Roy-ko Opposition dolni dilgipa songahani gimin da·oba Opposition dolni dilgipako songna man·aia,” ineba ua aganahachim.
Da·o dipet Meghalaya Assembly-ni Opposition dolo, Congress dolni sakbonga, All India Trinamool Congress (AITC)-ni sakbonga aro Voice of the People’s Party (VPP)-ni sakbri MLA-rang dongachim ine nikna man·a.
