SHILLONG: Meghalaya load shedding on·angkuanichi neng·nikaniko man·kuenga, a·dok bang·a project-rangko nangdapchongmotenga aroba bang·a Hydro project-rangko bilsirangna skango miksongaha, uamangoni saksaba neng·e-dikeba da·alona kingking chu·sokatna man·jaenga.
Batanggimin bilsi 10-15 bilsirango MLHEP, New Umtru aro ru·utgija salo oprake on·gipa Ganol Hydro power project gita ge·gittamsan power project-rangkosan chalaiengachim indiba ua project-rang a·doko bijolina dilanirangko chu·onga man·e on·a gita man·jaenga.
Bang·a Hydro power project-rangko namedake chanchiaha aro bang·arangna MOU-rangko soi ka·aha indiba da·alona kingking ua project-rangoni ge·saba bang·a dingtang dingtang a·selrang donganichi chu·sokatna man·kujaenga.
Project-rangko rikanirang ja·mamchakengani a·selrangko sing·anina, aganchakao a·ani bidingon dal·begipa neng·nikani dongaia aro maina hydro project-rangko rikna ru·uta somairangko nanggen ine Power Minister AT Mondal aganaha.
Minggipin badia projcet ja·manchakenga bang·a geological aiao inmanpilaniko ra·baaha.
Agan-mesokaniko janape, adita mine-rang uno dongaonin Kynshi project-rango adita jegalanirang AMD-o donga aro indake tarianirangna somai nangnanggen, Minister u·iataha.
Meghalaya-o adita Hydro power project-rang donga, sorkari da·alona kingking thermal, balwa, saloniko ra·gipa project-rangko a·bachengatna dongkuja aro project-rangoni bang·bataan chibimaoniko chalaigipa hydro project-rangsa ong·a.
Sorkari songonchokgipa salgipengjolo balwaoniko bijoliko bikotna sorkari chanchienga maina sorkari Bay of Bengal-oni ta·rakgipa balwarang balwaoniko bijoliko bikotna Meghalaya-na dakchakani ong·gen ine Minister aganaha.
