SHILLONG: Meghalaya a·doko bijoli jakkalenggipa mitam manderang, kajinarangko gamchipjaengani a·sel MeECL-na gong kror 300-na baten grorang dongkuenga ine kobor on·aha.
Iani bidingo kobor ra·timgiparangna talataniko on·angengon, bijolirangko jakkale MeECL-na kajina gamchipgijagipa dolrangoni mitamde ramram manderang, karkanarang aro gipinrang ong·a ine MeECL-ni Chairman-cum-Managing Director Sanjay Goyal talatangenba, kajina gamchipgijagipa manderangoni mitamkode da·o sandioba man·jaengaha ine parakataha.
Bijoliko jakkalenggipa je nokdangrangan, kajinarangko gamna chol ong·e gamchipjaengachim, uandakgipa nokdangrangoniko MeECL, bijoliko rattongna a·bachengataha ine janapatengon, a·dokni dingtang dingtang biaprango mobile tower-rangko chalaieba an·tangtangni kajinarangko gamchipjaenggipa mobile company-rangnaba MeECL, chittirangko watatmanaha ine Goyal parakataha.
Bijoli jakkalani kajinarangko gamchipgijagipa mobile company-rangni bijolirangko disconnect ka·gen ine mikrakataniko on·angengon, bijoliko jakkale kajina gamna chol ong·gipa nokdangrangkoba sorkari sandina jotton ka·enga ine Goyal parakataha.
Sorkari department-rangde kajinarangko bilsio changbri dake ba baditaba bilsirangnasa gamgopani gimin department-rangni kajinarangko ra·aniode maming neng·nikani dongja ineba MeECL-ni Chairman talataniko on·angaha.
