Samtangtango ong·telaigiparangko rakkina jinma bi·rimaniko ong·ata

TURA: Garo Hills-o buring bolgrimrang porongrong ong·roroangengahani a·sel bol-wa·arangsan ong·aigija do·o-mat aro matburingrangba gimaroroangengahani gimin samtangtango ong·telaigiparangko aro buring bolgrimrango donggipa matburingrangko ripinge rakkina gita dingtangmancha awareness program aro jinma bi·rimani program-ko Edenbari-o ong·atangaha aro ia tom·aniko ong·atanio dingtang dingtang Mondolini dilgiparang, sorkari official-rang, songsalna kam ka·enggiparang aro gipinrangba bakko ra·angtokaha.
Ia program-ko Garo Hills Environment Protection Society (GHEPS) ong·ataha aro ia program-ko ong·atanio GHEPS-ni president Dr Merril N Sangma, jinmana aganprakengon, samtangtango ong·telaigiparangko ripinge rakkina gita Garo Hills-o songdongenggipa pilak manderangkon ku·cholsan kam ka·china didiangaha. Mikkangchina Garo Hills-ni sam-bolrangko aro do·o-matrangko ripinge rakkina nangengani giminba Dr Sangma aganaha.
Ia tom·anio GHADC-ni gitcham chief executive membor (CEM) PK Sangma-ba dongpae jinmana aganprakangengon, Garo Hills-o tipangenggipa chiring chibisikrangko tangatpilna an·tangni kam ka·na skaniko parakangaha aro gipinrangkoba apsan daken bakrime kam ka·china didiangaha.
Iana skang, Rev Shallim Marak-ni jakchi Rongtalgipa Sastroni bakko poraiatenba, A·chik a·songko rakkichina gita Nokgipa Isolo bi·chakangaha.
Ia program-ko ong·atanio dongpae bakko ra·anggipa gipin manderangara, South Garo Hills-ni gitcham Deputy Commissioner HB Marak, GHEPS-ni Vice President aro ABDK-ni Youth Director Durasal Marak, Hawakhana Baptist Mondolini Pamong Rev Frithing D Sangma, Rev Jimberth K Marak, West Garo Hills-ni gitcham ADC CN Sangma aro gipinrang ong·a.