SHILLONG: Khasi Hills Autonomous District Council (KHADC)-o National People’s Party (NPP) baksa bakrime gital Khasi Hills Democratic Front (KHDF) Executive Committee-ko rikani ja·man, KHADC-osan Congress dol, NPP baksa bakrimaigen indiba a·doko NPP-chi dilenggipa dilenggipa MDA 2.0 sorkariode bakrimjawa ine Mongolbar salo, Nongstoin constituency-ni Congress MLA aro MDC Gabriel Wahlang parakataha.
Iani bidingo kobor ra·timgipa manderangna talataniko on·angengon, KHADC-o jattangni namgninasa Congress MDC-rang, NPP baksa bakrimaniko on·aha ine Wahlang parakataha.
“District Council-de a·dok sorkarioni namen dingtanggrika maina District council-ode chinga jattangni namgninasa kamko ka·giparang ong·a. Uni gimin NPP-chi dilenggipa MDA sorkariode chinga bakrimani katta dongja,” ine Congress MDC parakataha.
KHADC-o NPP baksa bakrimchina saoba Congress MDC-rangko didiahama ine sing·on, da·o dipet dolgnini bakrimanio NPP-ni president aro gipin dilgiparang maming ku·wata dongja ine Wahlang parakataha.
Budbar salo Congress dolni gita tom·e chanchirimangtaigen ineba ua parakataha.
Sombar salo, UDP-chi dilenggipa KHADC EC-ni kosako NPP-ni sak 12 MDC-rang aro Congress dolni sak 6 MDC-rang, No-Confidence Motion-ko ra·gatangani ja·man, gitcham chief executive membor (CEM) Titosstarwell Chyne-chi dilenggipa EC be·gruahachim ine nikna man·a. UDP-chi dilenggipa EC be·gruani ja·man NPP aro Congress dol bakrime da·o Khasi Hills Democratic Front (KHDF) Executive Committee-ko rikskaahachim.
