SHILLONG: Mongolbar salo, Khasi Hills Autonomous District Council (KHADC)-ni gital Chief Executive Membor (CEM)-ko seokna election-ko ong·atanio kamna susaskagiparang dongjahani gimin Sohryngkgam-ni National People’s Party (NPP) MDC Pyniaid Sing Syiem-ko gital CEM-na seokangaha.
CEM-ni kamna opposition doloni susajana gita tik ka·angani ja·man, Syiem-ko KHADC-ni gital CEM-na seokaha ine KHADC-ni Chairman Lamphrang Blah parakataha.
KHADC-ni gital CEM Pyniaid Sing Syiem, KHADC-ni gitcham chairman ong·achim aro da·o ua Congress baksa bakrimenggipa chalaienggipa Khasi Hills Democratic Front (KHDF) Executive Committee-ko dilangskagnok.
Ia gital EC-o NPP-ni sak 12 MDC-rang baksana Congress-ni sakdok MDC-rangba bakrimahachim.
Sombar salo, KHADC-ni gitcham CEM Titosstarwell Chyne-ni kosako No-Confidence Motion-ko ra·gatanio, NPP-ni sak 11 aro Congress-ni sak 6 MDC-rangko man·gope, sak 17 membor-rang uni kosako vote ka·ani ja·man, Chyne-chi dilenggipa Executive Committee be·gruahachim ine nikna man·a.
KHADC-ni CEM Titosstarwell Chyne-chi dilenggipa Executive Committee be·gruani ja·man, CEM-ni kamna susana gita NPP-ni MDC Pyniaid S Syiem, Sombar salon nomination-ko file ka·angskaahachim.
