SHILLONG: Re·anggipa Sombar salo, West Garo Hills a·jani Anti Narcotics Task Force (ANTF) sipairang, mande sakgniko heroin samrang baksa rim·na man·aha.
Police-rangni u·iatani gitade, pekatgipa samrangko badingenggipa manderangni gimin koborko man·soani ja·man ANTF sipairang, ia mande sakgniko rim·na man·aha aro ia mande sakgniara Tura Beldarpara-oni bilsi 37 ong·gipa Abinash Lohar aro Assam South Salmara a·jao donggipa Mankachar Kakripara-oni bilsi 35 ong·gipa Jobarul Hussain ong·achim.
Ia manderangoniko ANTF-ni sipairang, gram 1.51 ong·gipa heroin, mobile phone ge 2, gong 11,60 tangkarang, ML-08J 0131 autorickshaw aro gipin bosturangkoba man·aha ine kobor on·aha.
Iani bidingo police-rang mokordoma ka·e ning·tue sandianirangko dakengkua ineba kobor on·aha.
