TURA: A·gilsakni gipin biaprango gitan changskugipa International Yoga Day-ko Budbar salo, Garo Hills-ni dingtang dingtang biaprangoba maniangaha.
Ia International Yoga Day-ko Health & Family Welfare department-ni gita Tura-oba maniangaha aro ia salko manianio West Garo Hills a·jani Deputy Commissioner Jagdish Chelani, mongsonggipa sokgipa ong·e jinmana aganprakangengon, yoga-ra India a·songni mingsa man·rikrikbagipa dakbewal gita ong·a aro yoga-ko India a·songo chengonin pagitcham ma·gitchamrang ja·rikbaahachim ine talataniko on·angaha.
Yoga-ko ranta ka·anichi mandena be·enni gita an·seng baljokanikosan ra·baaigija, gisikni gita saanirangkoba chel·chakna dakchaka ineba ua aganaha.
Iana skang, International Yoga Day-ko maniani bidingo Tura Civil Hospital-ni Yoga aro Naturopathy Physician Dr Sambhu Aryal, jinmana talate on·angengon, mandeni janggi tanganio yoga-ra bang·a dakchakanirangko on·na man·ani gimin ia International Yoga Day-ko 2015 bilsionin a·gilsak gimikon June-ni 21 tariko manirongenga ine parakataha.
Yoga-ara India a·songon a·bachenggipa ong·e a·songo songdongenggipa manderangni mingsa dakbewal ong·a aro ian mandeko gisik aro be·enni gita an·seng rakkina dakchakgipa ong·achim indiba ia sal somoirango a·songo songdongenggipa manderang ia namgipa dakbewalko gualangengaha ine an·tangni suk ong·gijaniko parakataha.
Ia sal somoirango a·songni manderang Yoga kal·aniko ja·rikjahani a·selan ma·manti sabisi sakanchirangko man·ningbatenga ineba Dr Aryal aganaha.
An·tangtangko an·seng baljoke rakkina aro gisikni gita pangnan an·seng dongna Yoga-ko kal·jringchina gitaba ua program-o bak ra·giparangko aro mongsongbate chatro chatrirangko didiangaha.
Ia Yoga Day-ko manianio AIR aro DDK-ni Station Director, Tura DIPR-ni Assistant Director, District Medical & Health Officer, District Sports Officer, Police aro gipinrangba bakko ra·angtokaha.
Apsan daken, South West Garo Hills a·jaoba ia changskugipa International Yoga Day-ko Ampati Civil Hospital aro a·jani pilak Health & Wellness Centre-rangon maniangaha.
Ampati Civil Hospital-o ia International Yoga Day-ko manianio South West Garo Hills a·jani Additional Deputy Commissioner Yoshima W Momin, mongsonggipa sokgipa ong·e jinmana aganprakengon, songsalna yoga-ni gamchatgipa ong·ani gimin talate on·angenba, yoga-ni namgnirangko sakgipinrangnaba agan-talate on·skachina program-o bak ra·giparangko didiangaha.
Ampati-o International Yoga Day-ko manianio bak ra·anggipa gipin manderangara, Ampati Civil Hospital-ni Medical Superintendent Dr Denisha Momin, AYUSH-ni MHO Dr Marygina Sangma, National Ayush Mission-ni District Nodal Officer Dr Lachit Koch aro gipinrang ong·a.
Indake ong·engon, ia changskugipa International Yoga Day-ko 120 Bn CRPF-ni gitaba Tura-ni ISBT-o maniangaha aro ia salko manianio 120 Bn CRPF-ni Commandant Pramod Kumar Singh, dingtang dingtang officer-rang aro sipairangba bakko ra·angtokaha.
Ia salko manianio 120 Bn CRPF-ni Commandant Pramod Kumar Singh, kan·dike aganprakangengon, mande sakantinan Yoga-ra namgniko ra·bagipa ong·a aro mandena bilakgipa gisik aro an·seng baljokaniko on·a ine parakangaha.
