SHILLONG: Bharatiya Janata Party (BJP)-ko ra·galgenchimode, National People’s Party (NPP)-chi dilenggipa Meghalaya Democratic Alliance (MDA) sorkario bakrimna kusi ong·aigen ine Congress dol parakataha.
Iani bidingo kobor ra·timgiparangna talataniko on·angengon, MDA-o bakrimenggipa dolrang, BJP-ko ra·galgenchimode NPP baksa kamrangko ka·rimna kusi ong·aigenchim ine Meghalaya Pradesh Congress Committee (MPCC)-ni president Vincent H Pala parakataha.
Khasi Hills Autonomous District Council (KHADC)-o NPP aro Congress dolrangni bakrime Executive Committee-ko chalaiengani gimin janapatengon, “BJP dongja ong·ode chinga a·dok sorkariko chalaianioba NPP baksa bakrimna kusi ong·aigenchim,” ine Pala aganaha.
KHADC-o NPP baksa bakrimenga gitan MDA 2.0 sorkariko chalaianioba NPP baksa bakrimchina a·dokni Cabinet Minister aro Congress dolni gitcham dilgipa Ampareen Lyngdoh, Congress dolko didiatahachim ine nikna man·a.
Indake ong·engon, re·baenggipa 2024 bilsini Lok Sabha election-o Congress dolko NPP-oni susagen ine jangbingbanganikoba MPCC-ni president raken jegalataha.
Uko dingtang dingtang political dolrango napchina gita bang·a manderangan didina jotton ka·ahachim ine janapatengon, ua ramram mande ong·esa politics-ni kamko ka·na a·bachengaha aro pangnan doltangna kakket ong·en dongangkuaigen ine Pala parakataha.
