TURA: Tura-ni Urban Affairs Office-o Town Planning Officer/District Urban Planner-ni kam bangbang ong·e dongengani a·sel, department-ni kamrangko ka·anio neng·nikanirangko chagrongna nangenga ine Federation of Khasi Jaintia & Garo People (FKJGP) Garo Hills Zone (GHZ) parakatenba, ia kamko ta·raken gapatchina a·dok sorkariko didiataha.
Iani bidingo a·dokni Deputy Chief Minister aro Urban Affairs department-ni in-charge Sniawbhalang Dhar-na sedoatengon, Tura-ni Urban Affairs Office-o Town Planning Officer/District Urban Planner-ni kamko gapatgija donchipengani a·sel kamrangko gipin officer-rangsa ka·na nangao ga·akenga aro ian department gimikna neng·nikaniko ra·baani gita ong·enga ine FKJGP-GHZ parakataha.
Department ge·antion kamrangko name nirokna gita chubata gadango kam ka·gipa official-rangko nangtela indiba Tura-ni Urban Affairs Office-o Town Planning Officer/District Urban Planner-ko songe on·ningjaenganiara ia niamkon ja·rikjaenga gita ong·a ine janapatengon, ru·uta somoirangna iandakgipa officer-rang dongjanichi, Tura jillani wilwilao mongsonggipa project ba kamrangko chu·sokatanio ja·donggaatako man·ani cholrang donga ine FKJGP GHZ parakataha.
West Jaintia Hills a·jaode Jowai-ni Urban Affairs Office-o bangbang ong·e donggipa kamko antisa ba antignini gisepo gapataia ine janapatengon, Tura-oba ia Urban Affairs Office-ni Town Planning Officer/District Urban Planner-ni kamko ta·raken gapatchina FKJGP-GHZ, a·dokni Deputy Chief Minister aro Urban Affairs Minister-ko didiataha.
