TURA: Da·ororo salantian mikkarang jime waengon, Bristibar pringoba mikkarang jime waangani ja·man, re·anggipa bilsini December jao Chief Minister Conrad K Sangma-ni nokdonggae on·anggipa PA Sangma Stadium-o a·arang ruronge, ia stadium-ni mitam bak be·wakangaha.
Ia stadium-ko kadulgipa pakmarang, ka·mao donggipa gitcham Coal India Limited office-chipakna be·wakangaha aro a·arang be·wakangenba, manderangni re·ruraenggipa ramarangko dapeaha.
Ia stadium-ni be·wakangani ja·man bang·a manderangan sorkarini kamna kusi ong·gijanikoba parakattokaha.
Ia PA Sangma Sports Complex-ko gong kror 127.7 koros ong·e rikahachim aro ia sports complex-ni robol kal·chakgipa stadium-kode re·anggipa bilsini December jaon, Chief Minister-ni jakchi nokdonggae on·angahachim.
Ia sports complex-ko rikengmiting somoirangon dingtang dingtang dolrang, ia stadium-ko name rikjaenga ine badi ka·tokahachim indiba sorkari, dingtang dingtang dolrangni badi ka·aniko knachakgija, ian opposition dolrangni politics kal·anisan ong·aia ine aganskaaiahachim.
Indake ong·engon, ia stadium-ni pakma be·wakahani gimin magisterial inquiry-ko dakchina gita ge·etaniko on·ataha ine West Garo Hills a·jani Deputy Commissioner Jagdish Chelani parakataha.
Inquiry report-ko man·ahaon nangani kri ja·kurangko de·anggen ineba Deputy Commissioner parakataha.
DC-ni parakatani gitade, ia inquiry-ko West Garo Hills a·jani Assistant Commissioner dilanggen.
