TURA: Williamnagar-ni Deputy Commissioner (DC) office-o donggipa Public Facilitation Centre-o internet aro dingtang dingtang kolrang name kam ka·jaengani a·sel, dingtang dingtang kamrangna re·baenggipa manderang neng·nikanirangko chagrongna nangtokenga ine Garo Students Union (GSU) Eastern Zone, East Garo Hills a·jani Deputy Commissioner-na badi ka·doataha.
GSU Eastern Zone (EZ)-ni president Saljrang Tengrik R Marak-ni parakatani gitade, ia Public Facilitation Centre-ko, dingtang dingtang kamrang, jekai PRC, Registration of Societies, Caste Certificate aro uandakgipa dingtang dingtang kamna re·baenggipa manderangko dakchake on·na gitasa donahachim indiba ia centre-o internet aro gipin kolrang name kam ka·rongjani a·selan chel·a biaprangoni re·baenggipa manderangde, kamrangko matchotgija re·angpilna nangrongengachim.
“Williamnagar-ni DC office-o donggipa Public Facilitation Centre-o internet aro gipin kolrang name kam ka·jaengani a·sel dingtang dingtang kamna re·baenggipa manderang neng·nikanirangko chagrongna nangtokenga ine chinga changni chang badi ka·anirangko man·soaha aro unbaksa ia PFC-o kam ka·giparangba manderangko dakchake on·ani pal ka·saninggija dake mesokrongani a·sel manderang dakchakanirangko man·jaenga ineba chinga koborrangko man·soaha. Chingna u·iatani gitade, ia centre-o kam ka·enggiparang, caste certificate-ni form-mangmangkoba manderangna on·na jechake, private Customer Service Centre (CSC) ba cyber-rangona re·angchina aganenga. CSC-rango caste certificate-ko tarina kingprakon gong 300-oni gong 500-mangona ra·enga indide songni nokni manderangara maikai CSC-rango caste certificate-rangko tarina man·gen? PFC-ko sorkari manderangni namgninasa donaha indide maini gimin caste certificate-rangko tarina gita ramram manderangara CSC-rangona re·angna nanggen?” ine GSU-EZ-ni president sing·doataha.
