SHILLONG: Meghalaya a·doko petrol aro diesel-ni damrangna a·dok sorkari, kajinako bariatani ja·man petrol aro diesel-ni damrang adita tang·doangskaaha.
Mitam petrol pump nokgiparangni u·iatani gitade, re·anggipa June-ni 10 tarikon Meghalaya sorkari, kajinako paisa 50-ni bariataha indiba mitam petrol pump-rangode petrol-ni damrang barikujaengachim.
Da·o kajinako bariatahani gimin sorkari, petrol litre-prakon gong 13 kajinako ra·enga aro diesel-ko litre-prako gong 6 ka·e ra·engaha ine kobor on·aha.
Sukrobar salona kingkingde Shillong-o petrol litre-prakni dam gong 97.47 aro diesel-ni damara gong litre-prako 85.71 ong·engachim.
Kajinarangko bariatengani gimin janapatengon, petrol-ko litre-prako gong 30-san palani ong·aigenchim indiba a·dok aro ma·mong sorkarirang, kajinarangko ra·engani a·sel petrol-rangko dam rakbate palna nangao ga·akenga ine petrol pump nokgiparang parakataha.
