SHILLONG: Bharatiya Janata Party (BJP)-ko ra·galgenchimode National People’s Party (NPP)-chi dilenggipa Meghalaya Democratic Alliance (MDA) sorkari baksa bakrime kamko ka·na kusi ong·aigenchim ine aganahani gimin Sukrobar salo BJP, Congress dolko matnangataha.
BJP-ko ra·galgenchimode NPP baksa kamko ka·rimna kusi ong·aigen ine Meghalaya Pradesh Congress Committee (MPCC)-ni president Vincent Pala-ni agangipa kattarangko jegalatengon, uni agangipa kattarangara an·tangtangko manderangna mesokna agangipa kattarangsan ong·aia ine BJP-ni ku·wattimgipa M Kharkrang parakataha.
“India a·song gimikon aro mongsongbate Meghalaya a·doko Congress dolara, napsrimangenggipa jahas gitasan ong·aiaha ine pilakan ma·sienga aro uamang an·tangtangni bon·angenganiko ra·chakna man·tokkujaenga,” ine Kharkrang aganaha.
Congress dolni iandake agangipa kattarangara, a·gilsak gimikon Prime Minister-ni man·enggipa mande ra·ani aro ka·saaniko champengna jotton ka·anisan ong·enga ine janapatskaengon, ian BJP-ni tangka jakkalsretaniko bon·atna kam ka·anio Congress dolni kenaniko mesokanisa ong·enga ine Kharkrang parakataha.
“Congress dolara ong·gija kamrangna mingsinggipa dolsa ong·ani gimin tangka paisa jakkalsretani grigipa sorkariko rikanide namen dingtanggipasa ong·enga. BJP-ko gale MDA baksa sorkariko rikna jumang nikaniara Congress dolni coalition politics-o ma·sigijaniko mesokanisa ong·enga,” ine BJP-ni ku·wattimgipa parakataha.
MDA-o bakrimenggipa dolrang, BJP-ko ra·galgenchimode NPP baksa kamrangko ka·rimna kusi ong·aigenchim ine Meghalaya Pradesh Congress Committee (MPCC)-ni president Vincent H Pala parakatahachim.
Khasi Hills Autonomous District Council (KHADC)-o NPP aro Congress dolrangni bakrime Executive Committee-ko chalaiengani gimin janapatengon, “BJP dongja ong·ode chinga a·dok sorkariko chalaianioba NPP baksa bakrimna kusi ong·aigen,” ine Pala aganahachim.
