Shillong-ni A·chik musician saksa Austria-o perform ka·na seokako man·a

SHILLONG: Shillong songjinmaoni A·chik musician saksa Ambasal Cheran Momin-ba re·anggipa June 18 tariko, Austria a·songni Konzerthaus Vienna-o ong·atanggipa Carmina Burana Concert-o Philharmonie of University Vienna Wien baksa perform ka·na ba dokna dam·na gita seokako man·aha.
Ia concert-o India National Youth Orchestra & Chorus-ni gimik sak 26 musician-rang perform ka·na gita seokako man·aha aro ia sak 26-oni Ambasal Cheran Momin-ba saksa ong·paaha.
Ia concert-ko India aro Austria a·songni gisepo bilsi 75-na meli nangrime donganiko maniani bak gita ong·ataha aro uandaken da·o October-ni 29 tariko Lucknow-o aro October-ni 31 tariko New Delhi-o ia apsan dakgipa concert-ko ong·atanio Austria a·songni musician-rangba India a·songona re·bae perform ka·angskagen.
Koborko on·ani gitade, Austria a·songo perform ka·na seokako man·gipa A·chik musician Ambasal Cheran Momin, violin, bass guitar aro Classical Double bass-o specialise ka·gimin chatro ong·a aro ua da·o Vienna-o double bassist ong·e Music-ko skie ra·enga.